Journal des penchants du roseau

Toutes lesdites compagnies ainsi ordonnées arriverent devant le château, soubs l’un des ponts de la maison de pierre, prison du bailliage où estoit escrit en un tableau d’antique le huitain qui ensuit :

Huitain.

Gentils Conards tous remplis de noblesse,
Dessoubs ces ponts passez asseurément ;
Ne craignez point qu’on vous face rudesse,
Les huis sont clos, de peur du mauvais vent.
Si vostre abbé, aussi tout le couvent,
Passent poing clos et l’espée au fourreau,
Marchez tout beau, chevauchez doucement,
Ne doubtez rien que le mauvais carreau.

Tant cheminerent qu’ils arriverent au pont de Robec, auquel lieu avoit un echaffaut dedans lequel estoyent joüeurs d’ins­truments, sonnans mélodieusement pour l’arrivée du sieur abbé, et de sa compagnie. L’un des courriers et hérauts duquel nommé Sablon mouvant, contre son naturel instinct, ne donna que deux coups de baston sus deux pages, passans au travers des bandes pour aller abbrever leurs chevaux, dont l’on cria miracle.

Plusieurs desdites bandes avoyent des petits sachets de dragée, qu’ils donnoyent aux dames qui estoyent aux boutiques et fenestres, avec autres rondeaux et dizains joyeux, en particulier sans scandalle, qui n’a esté possible de recouvrer. Et n’ay veu ce jour avoir tant souffert de peine comme les chevaux, entendu que de toutes les bandes il y en avoit tousjours de bondissans en l’air, selon les lieux et endroits, les uns plus que les autres.

Le jour de ladite monstre ainsi fait, se retirerent les bandes et compagnies en divers lieux, tenans maisons ouvertes, ayans falots flambans aux fenestres. Et aprés soupper se delibererent aller en masque voir l’un l’autre et autres compagnies aux maisons bourgeoises, esquelles avoit grand nombre de dames et damoy­selles, lesquelles furent resjouyes de voir lesdites com­pagnies tant joyeuses, les unes joüans le mommon, les autres des verges, bracelets, et autres bagues et fantasies nouvelles. Les autres dansoyent, dont de tout lesdites dames et damoyselles estoyent fort contentes. Et le lendemain lundi et mardi, plusieurs desdites bandes, et autres, changerent d’abits pour porter masque, si n’est memoire d’avoir veu masques et mom­mons plus braves et en plus grand nombre, dont les uns se trouverent joyeux, les autres marris, comme il advient d’une bataille. Toutesfois aux amans, lesquels avoient contenté l’œil, né leur estoit rien la perte ou gaigne, entendu que ce n’estoit la cause qui les y menoit.

Le lendemain, lundi gras, aprés soupper, l’abbé tenant maison ouverte, le conseil assemblé, fut deliberé le lendemain faire le disner, non en la maniere accoustumée, mais en plus grand triomphe et singularité. Et fut conclud le faire à la halle aux draps de nouveau bastie, la plus belle et espacieuse qui soit en France. Aussi fut esleü pour le palais de l’abbé, et fut fait et imprimé une semonce, laquelle fut leuë le mardi matin et affichée aux lieux accoustumez, dont la teneur ensuit, pour laquelle publication mirent sus cinquante hommes bien accoustrez, masquez et montez, avec l’huissier et sergent, lequel faisoit la lecture.

De par l’abbé.

Guillaume, abbé centiéme de ce nom,
Des Conards, prince et prelat pacifique,
A tous nos sots, ou qui en ont le nom,
Et gouverneurs de nostre republique,
̃Salut à vous. Or, comme il soit ainsi que
Le gras conseil de par nous assemblé
Pour réformer comme il nous a semblé,
Tous cas conards, et que, tout bien pensé,
N’avons permis qu’aucun fut dispensé.
Pour cas conards, cogneu l’ingratitude
Qu’ils ont envers nostre mansuetude,
Pourquoy, supposts, promptement vous tournez
Aux sots Conards, et qu’ils soyent adjournez
A comparoir demain sur le midi,
Nostre haut jour du gros et gras mardi,
Pour ouyr lire au long les Conards faits
De nos niais de vertu tous deffaits.
Sommez-les tous venir ce mardi gras
Avecques nous à la grant halle aux draps ;
Qu’ils viennent tous, c’est prés la vieille tour,
Afin d’ouïr reciter maint sot tour.
Là nous tiendrons ouverte et nompareille
Maison à tous, où vous orrez merveille.
Venez, Conards, en ceste neuve halle,
Et ne craignez de chaut ou froid le hasle ;
Vous y verrez novices et convent
Logez au large, hors la pluye et le vent,
Pour recevoir des gens un million,
Plus que n’avons de coustume au Lyon.

Fait au conseil, à l’ombre de nos pots, Signé de nous et de nos bons supposts.

Furent affichez en grosse lettre plusieurs escriteaux audit lieu, contenant ces mots :

Pallais pour l’abbé.

Le lendemain, mardi gras, le disner préparé audit lieu, à dix heures du matin, se mirent sus une compagnie masquez, portans la crosse parmi la ville, ayans falots et tabours pour sonner et semondre ledit disner, ainsi qu’il est accoustumé. Incontinent se trouverent des tables pleines de nombre de gens inestimable, sans autres qui ne sceurent avoir place, lesquels furent contraints eux retourner.

L’ordre du disner estoit telle : il y avoit six tables tout d’une longueur, et là estoyent assis tout d’un costé, en forme de convent, ayant le regard l’un vers l’autre. Au milieu y avoit un eschaffaut pour jouer les farces, comedies et morisques, fait de sorte qu’on pouvoit passer par dessoubs pour le service dudit disner ; et dessus y avoit un personnage abillé en hermite, assis sus une chaise, lequel, en lieu de Bible, lisoit continuellement, durant ledit disner, la Cronique Pantagruel.

Au bout de ladite salle y avoit un theatre haut eslevé, richement tapissé, sur lequel estoit le sieur abbé au millieu ; et aux deux costez, le chancellier, patriarche, et cardinaux, vestus de leurs abits pontificaux, son huissier tenant sa verge en un bout, et le sergent à l’autre pareillement tenant sa masse, en bon ordre et gravité. Aux deux bouts, les trompettes et haubois ; et en bas estoyent les phiffres et tabours. A l’un des costez, Espinette organisée jouant avec chantres de musique. De vous escrire la diversité des viandes, mets, entremets, ce seroit temps perdu, car c’est chose ordinaire ; pourquoy viendrons à la fin du disner, auquel furent faits plusieurs farces et comedies, dances et morisques, en grand nombre, avec bonnes moralitez et de bonne audace.

Après lesquels fut leü le cas des deffaillans, redigez en rethoricque de grande joyeuseté. Et, tout leü, l’abbé se retira au conseil du costé ou estoit assis le chancelier, et aprés au patriarche et cardinaux estans de l’autre costé, lesquels il trouva en grant controversie pour difficulté des cas ; en sorte que le conseil assembla plusieurs fois pour demourer d’accord à qui seroit adjugée la garde et maistrise de la digne crosse. Et par la plus saine et grande partie des assistans fut adjugée à un practicien (de Cœli pallatio), pour avoir joué sa femme, à Bayeux, aux dez, etc.

Un autre pauvre Conard, morfondu et engelé, eust le debattu (una voce dicentes). Parquoy furent lesdits joyaux portez, aprés que par la bouche ouverte, gueulle, bec du sieur abbé, l’arrest eust esté prononcé, aux maisons et domiciles des dessusdits declarez et approuvez sots et glorieux Conards, avec force falots et tabourins.

précédent

in Les Conards de Rouen, 2009.

Ceste compagnie passée, marchoyent en bon ordre trente hommes à cheval, accoustrez de robbes de satin blanc à pourfilures de fin or, les affuls de figure de teste de lyon ; à l’environ force flammes de feu, faits de satin cramoisi enrichis de broderie, tenans en leurs mains un monde renversé. Leurs chevaux, caparensonnez dudit satin, et pourfillures avec houppes de fil d’or et de soye. Devant eux vingt six falots flambans, six tabours et un phiffre, avec le porte enseigne à cheval, accoustrez de leur pareure, en laquelle estoit escrit : Les estonnez du monde.

Un cheval d’eux avoit deux lignes de rithme escrit derriere le dos, qui ne se sont peu recouvrer, et des aucuns venus à cognoissance, sont cy aprés escrits comme ensuit :

Premier.

Si je porte feu aux aureilles,
C’est pour raison des grands merveilles.

Deuxiéme.

Non sans cause je m’esbahis,
Voyant ruiner ce païs.

Troisiéme.

Le feu mon chef tout environne…
Ce poinct m’esbahit et m’estonne.

Quatriéme.

Ma main tient monde renversé
Pour mal qui y a conversé.

Cinquiéme.

Je m’esbahis et ne dis mot
De voir Rouen ainsi remord.

Sixiéme.

Estonné de voir la saison,
Je pers le sens, aussi raison.

Septiéme.

Esperdu suis de voir la contenance
De mainte femme au marcher et en dance.

Huitiéme.

Esmerveillé vis en soucy
Et estonné de voir cecy.

Neufiéme.

Tout estonné suis par la teste.
Plus m’esbahis et plus suis beste.

Dixiéme.

M’esmerveillant propos se sourt
Des estonnez de nostre court.

Unziéme.

Estonné de voir les mutins,
Je plains les os des Maillotins.

Douziéme.

En speculant, des jans je vois
Qu’on maine paistre par les doigts.

Treiziéme.

Dessoubs mon feu je me soubsris
Du sot jugement de Pâris.

Quatorziéme.

La façon des habits m’estonne
Qu’on porte en hyver et automne.

Quinziéme.

Estonné d’ouïr tes propos,
Je me trouve trop dispos.

Saiziéme.

Esmerveillé des interdits,
Je crains à proferer maints dits.

Dixseptiéme.

Je m’esbahis du temps qui court,
Voyant pauvreté qui accourt.

Dixhuitiéme.

Je m’esbahis de la grandeur
Du pere abbé et sa grosseur.

Dixneufiéme.

Je m’estonne, veu le bon guet,
Qui a peu desrober Duguet.

Vingtiéme.

Estonné de nos coquibus,
Je les remets au cas d’abus.

Plus, par eux, estoit baillé durant ledit tour, quatre dizains impri­més dont la teneur ensuit :

Si, des bigots, cesse la caphardise,
Et des senats la justice sans fi ;
Si loyauté et foy sont marchandise,
Le temps viendra qu’on vivra sans soucy.
Pour le present ne le trouvons ainsi :
Pour Dieu barat benefices trocquez,
Gens de justice sont de vices marquez,
Ne reste plus que noblesse qui blesse
Pauvre commun. Or, ce cogneu, jocquez
Les trois en un : c’est nihil. Qu’el fin est-ce ?

Tel ne sçait rien qui est fort exalté,
Tel sçait, du bien, lequel bien peu on prise ;
Tel a si haut depuis deux ans monté
Qui tombera de plus haut qu’une eglise ;
Tel a souvent du vent de la chemise,
Qu’il n’entend pas sa gaine bien comprendre.
Or, devinez, si mes dits voulez prendre,
Qu’il adviendra des choses nompareilles.
Je le diray, on ne m’en peut reprendre,
C’est que l’on void ce jour l’an des merveilles.

Les faits nouveaux et actes de folie,
Font esbahir les grans et les petits ;
Les faits des fols ce jour, chacun follie.
Vous le voyez par rebus inventifs,
Des malversans tels faits sont destructifs.
Il est requis les fautes corriger,
Faire rouger et le monde songer,
Sans rien nommer, mais le monstrer par signes.
Heureux est cil qui ne craint ce danger,
Encore plus, qui fait œuvres condignes !

Nous, estonnez, esbahis, esperdus,
Portons le feu autour de nos aureilles.
Feu de lyon, en courages ardus,
Vous fait sçavoir qu’il est l’an des merveilles.
Actes voyons dont n’en fust de pareilles
Depuis le temps de nostre inception.
Taisons cela, n’en faisons mention ;
Le jour viendra que vivrons en repos.
Quant est à nous, c’est nostre intention
Vivre de hait et bien vuider les pots.

Aprés, marchoyent plusieurs compagnies, au nombre de deux cens hommes à cheval ou au dessoubs, accoustrés de differents abits, chacun ayant sa devise, avec grand nombre de falots, tabours, cymballes, cornemuses, cornets, hauts-bois et bedons ; chose plaisante à voir, encore plus à ouyr.

précédent - suivant

in Les Conards de Rouen, 2009.

Aprés eux venoit une autre bande, conduite par vingt fallots flambans, quatre tabours et un phiffre fort bien en ordre, avec le porte-enseigne bien monté et accoustré, en laquelle enseigne estoit escrit d’un costé : Et lux tenebris lucet, et eam non comprehenderunt.

Et de l’autre costé estoit un personnage ayant les yeux bandez, regardant vers le ciel. Aux deux costez d’iceluy y avoit deux mains qui luy ostoyent ladite bande de devant les yeux ; et au dessoubs estoit escrit : Clarté rendant en tenebres lumiere.

Aprés, suivoyent neuf personnages ayans longues robbes de damas blanc ; sur leur espaule un chapperon de satin violet, et bonnets ronds d’icelle couleur, portant masques anciennes et longues barbes chesnuës, montez sur mullets houssez et enharnachez riche­ment ; un chacun d’eux ayant deux lignes de rithme, qui sont cy dessoubs escrits :

Premier.

Mes yeux le droit n’ont voulu veoir,
Mais Dieu y a voulu pourvoir.

Deuxiéme.

Comme à Saül m’est renduë la veuë
Par la grand clarté qu’ay receuë.

Troisiéme.

J’estois muet, je parle bien :
Droit parler est souverain bien.

Quatriéme.

Sodomiens vicieux et infaits
Furent par feu en tenebres deffaits.

Cinquiéme.

Pour avoir vescu en tenebres,
Nous en faisons pompes funebres.

Sixiéme.

Nous avons prins mauvaise sente,
Mais nous recouvrons la decente.

Septiéme.

Le jour dedans la nuict profonde
Est veu par la machine ronde.

Huitiéme.

J’ay les tenebres tant cerché
Que mon credit en est marqué.

Neufiéme.

J’ay laissé le droit sans raison,
Mais droit m’a pugny en saison.

Autre bande venoit aprés, au nombre de vingt six hommes bien en ordre, vestus d’abits de satin vert, de grand façon et richesse, ayant affuls de testes bien faits. Sur chacun afful y avoit un mast de navire avec la hune, leurs chevaux caparensonnez de leur pareure. Un chacun d’eux avoit derriere le dos deux lignes de rhétorique qu’il n’a été possible de recouvrer. Pour leur conduite, marchoyent devant eux douze fallots flambans, cinq tabours et un phiffre, avec leur porte-enseigne accoustré avec les tabours et phiffres de leur pareure ; à laquelle enseigne estoit escrit : Les vers matez.

Marchoyent aprés, avec grande hardiesse, neuf personnages vestus de bons abits de trippe de velours rouge bendez de satin blanc ; le collet devant et derriere dudit satin de grand gayeté dessus ledit collet ; et y avoit bendes esdits neuds de broderie, faits de soye perlée noire ; un haut afful de satin blanc bendé desdits neuds. Leurs chevaux, bien bravement caparensonnez que rien plus, masquez et montez à l’advantage, avec bonne grace tant de conte­nance que d’abits, et ayant devant eux force fallots flambans, tabours et phiffres accoustrez bravement, avec le porte-enseigne monté et accoustré de semblable pareure. En laquelle enseigne ou banniere estoyent figurez d’un costé force neuds, et de l’autre costé estoit escrit deux lignes en rithme, comme il ensuit :

Bienheureux est au temps present,
Qui, de ces neuds faits, est exempt.

Et par eux estoit presenté par la ville, aux gens qu’ils cognois­soyent estre de bon esprit, deux dizains dont la teneur ensuit. Ensuit les deux dizains de ladite bande des neuds faits, et estoyent neuf personnes.

Dizain.

Vist-on jamais en tout le monde faire
Tant de neuds faits qu’au temps present sont faits ;
A l’un bien faire, à l’autre tout deffaire ;
L’un descharger, à l’autre bailler faits ;
De l’un et l’autre examiner les faits ?
Pour bien cercher s’il y a que reprendre,
Voilà, messieurs, les neuds faits pour bien prendre
Que vous voyez estre en ce temps present :
Dont je conclus, sans plus outre entreprendre,
Bien-heureux est qui en peut estre exempt.

Autre dizain.

Voyez, messieurs, si sçauriez desnoüer
Du temps present les neuds faits et à faire.
Non, car le fort si fort les fait noüer,
Qu’impossible est qu’on les puisse deffaire,
Et, qui pis est, tousjours c’est à refaire.
Pourquoy cela ? En leur convention
Y a tousjours nouvelle invention,
A celle fin que l’on tire et attrape.
Helas ! Helas ! c’est leur intention :
Pour un tirer, estraindre trop la grappe.

précédent - suivant

in Les Conards de Rouen, 2009.

Par ceste bande estoit donné le dizain, duquel en certains lieux estoit faite lecture avec une ballade, ainsi que devant est dit, dont la teneur ensuit :

Pour subvenir aux affaires urgens
De nostre abbé, sans matière lassive,
Et resjouir nos marquis et regens
Luy avons fait ce jourd’huy la laissive.

Dizain.

Religion assemble les drappeaux,
L’Eglise eschange, et Foy et Verité
Y teurdent fort ; Simonie en fardeaux
Le linge baille, et dame Pauvreté
Le linge estend ; puis, par Activité,
Ambition assiet, et Avarice
Le feu allume ; en tout plie Justice ;
Faveur, Richesse y lavent par esbat ;
Hipocrisie, a de verser, l’office ;
Folle Amour seiche, et Noblesse après bat.

Ballade où par ordre est escrit
Ce qu’entend le dizain subscript.

Religion assemble en un grand sac
Force drappeaux soubs sainte Vérité,
Et pour emplir de bribes son bissac,
Blasme Avarice et presche Charité.
L’Eglise eschange, en grand authorité,
Linge sacré, et le portent par faits
Petits asnons et grands asnes parfaits.
Verité teurd, et Foy par chemins droits,
Tant qu’on les blasme en France et Normendie,
Et de tels gens se sert en maints endroits,
Le pere abbé et dame Conardie.

Ambition assiet dedans le bac,
Montée en haut par curiosité ;
Lors Simonie et d’abhoc et d’abhac
Le linge baille soubs grande falsité.
Puis Avarice, en champs, ville et cité,
Le feu allume avec soufflets infets ;
Hipocrisie en vaisseaux putrefaits
Verse et reverse, et tousjours fait la croix,
A celle fin que bonne on la die,
Pour demonstrer quell’ sert du bout des doits
Le pere abbé et dame Conardie.

Richesse lave, et Faveur en un lac
Prenans plaisir en toute volupté,
Avec leurs chiens suivent la beste au trac,
Et tout leur train selon leur volonté.
Noblesse y bat en pompe et gravité,
Et Pauvreté, honteuse en dits et faits,
Tousjours estend, dont tels sont les effets
Que grief travail luy tout parolle et voix ;
Faute d’argent luy contraint qu’ell’ mendie.
Voila comment se sert en maints endroits
Le pere abbé et dame Conardie.

Envoy.

Conards aimants les amoureux tournois,
Folle Amour seiche ainsi que font les noix ;
Aprés, Justice au besoing souvent plie,
Et le tout serre en vieil coffre de bois
Le pere abbé et dame Conardie.

précédent - suivant

in Les Conards de Rouen, 2009.

Après, marchoyent en bon ordre seize hommes vestus d’habits justes tout d’une venuë, depuis la teste jusques aux pieds couleur d’enfumé, n’ayans que des pertuis aux yeux et bouche pour avoir la veuë et alaine, aux chevaux caparençonnez de mesme pareure, ayant devant eux quarante falots et une lanterne, force tabours et phiffres. Leur porte enseigne à cheval, accoustré avec lesdits tabours et phiffres de pareil accous­trement, en laquelle enseigne estoit figuré des deux costez, deux personnages en leur semblance tenant un grand escom­partiment, dedans lequel estoit escrit : Les umbres de Conardie ; et au dessoubs avoit escrit ; Sapiens habet oculos in fronte, stultus, veluti cecus, palpitat in tenebris ; et donnoyent les huictains ensuivans au peuple par la ville.

L’Umbre de je ne sçay qui.

Je voy pour le present regner
Force, faveur et flatterie ;
L’un sur petits veut dominer,
L’autre en amis son fait charie.
Le flatteur en court s’apparie,
Sous umbre de nisi quia ;
Mais, considerans l’affaire,
Je ne sçay qui passe, qui a.

L’Umbre d’authorité.

Authorité maux non legers,
Sous l’umbre d’estres tresperis,
Veut que souffres et grans d’angers
Troublent souvent vos esprits.
Plusieurs par ce point sont peris,
Ayans, du credit, le royaume ;
S’estimans exemps des perils,
Mais Fortune en joué la paume.

Umbre du temps.

Je voy l’Eglise desguiser
Soubs umbre de custodino ;
O devant N diviser
Fait en Noblesse : on blesse, a quo.
Soubs umbre de ce verbe Do
Dorment Justice et Vérité.
On fait de Foy Fy, ostant O,
Et I se pert en Charité.

Umbre de folie.

Soubs umbre de faire le fol,
On entre aussi tost aux maisons ;
Qu’un aussi sage que saint Pol,
Avec sa prudence et raisons.
Fols trop plus estourdis qu’oisons,
Et Conards sont permis tout dire,
Tant en ces jours qu’en Rouvaisons,
Sans encourir du prince l’ire.

Umbre des vieils peres.

J’ay veu en nos Champs Helisées,
De vous nos Conards et supposts,
Les fantasies et risées
Diverses en faits et propos ;
J’ay veu que soubs l’ombre des pots
On devisoit mainte sornette
Plus estimée de nos sots
Que d’un advocat la cornette.

Umbre d’ipocrisie.

Soubs umbre de religion
Regnent, ce jour, papelardise
Et scysme, en mainte region,
Contre Dieu, la Foy et l’Eglise.
Loups ravissans d’estrange guise,
Soubs l’habit de simplicité,
Font que l’escrit saint on desguise
A l’umbre de grand sainteté.

Umbre de marchandise.

Force m’est que des heureux chants
L’umbre de moy cy ne defaille ;
Marchandise fait piteux chants
Pourtant que trop on la detaille.
On la bat d’estoc et de taille.
Soubs umbre de je ne sçay qui ;
Plus que rural elle a de taille
Dont on ne sçait plus vendre à qui.

Umbre de bonne foy.

Soubs umbre de la bonne foy
Que l’on voit apparoir à l’homme,
Je vois frauder Dieu, pape et roy,
L’Eglise et ses gens qu’on assomme ;
Et pour credit de grande somme
Je voy par tout banqueroutiers.
Ainsi, faute de foy, en somme,
Fait qu’on ne preste volontiers.

Umbre d’argent.

Soubs umbre d’argent, maint novice
Est devenu maistre et monsieur ;
Je voy benefice et office
Trocher et vendre bled en fleur ;
Faveur aime trop sa couleur,
Et mainte on chevauche sans elle ;
D’argent on a joye et douleur,
Et soubs sa couleur on chancelle.

Umbre de bien.

Soubs umbre de pelerinage,
On va voir le clerc saint Fessin.
Pour mieux jouyr du personnage,
Compère on fait monsieur Tassin.
Il n’y a croix, chappe ou coissin
Que l’on ne vende au plus offrant,
Et le peuple est comme un poussin,
Soubs umbre de bien mal souffrant.

Umbre d’ambition.

Soubs umbre d’une belle robbe,
L’on void commettre tant de vices,
Que pauvre on tuë et riche on robbe
Par subtils arts et malefices.
On void tant de neuves offices
Qui sont du peuple la ruine ;
Dont je dy que tels benefices
Donner ou vendre est chose indigne.

Umbre de bien public.

L’umbre de parens et d’amis
Rend serve nostre republique
Les conservateurs y commis
Si gouvernent par voye oblique.
De dueil j’en ay eu la colique
Si pusillanimes gens y voir.
J’ay leu d’un bon Romain rustique
Qui en eust mieux fait son debvoir.

Umbre insensé.

Au temps où naquist Jesuchrist,
Herodes, roy hors de bon sens,
fist tuer, comme il est escrit,
Petits enfans et innocens.
Ce tirant faillist entre cents
A son vueil, dont fust prevenu ;
Mais, veu l’umbre des faits recents,
Ne sçay si ce temps est venu.

Umbre de droit.

Je voy pour le jourd’huy grand nombre
D’hommes seoir au lieu d’equité,
Ne representans rien fors umbre
De rigueur et iniquité.
Clemence le lieu a quitté,
Umbre de bien faire y domine.
Par ma mort j’en suis acquité
Et exempt de telle ruine.

Umbre de Venus.

Entre les umbres de ce monde,
J’ay veu soubs umbre des courtines
Le plaisir qui de chair redonde
A l’umbre des gentes tetines.
J’ay veu soubs umbre de matines
Et de la messe de minuict
Laisser chasubles et platines,
Pour avoir l’amoureux deduit.

Ecclesiastes, cap. 5.

Umbre de qui vous voudrez.

Là où bien de fortune abonde,
Souvent l’on y voit pour manger
Abondance de petit monde
Pour le dissiper et ronger
Car, tout ainsi qu’à l’arranger
Le pere avoit prins soing et cure,
Ainsi prend l’enfant d’eschanger
Son bien à rien : c’est sa nature.

précédent - suivant

in Les Conards de Rouen, 2009.